السبت، يناير 13، 2007

الجنـــــة

الجنـــــة
ليل طويل
وأحلام كتيرة على مخدتي
فيه حلم عمره سنة
وأحلام دخلت في سن الكهولة
وأحلام شاخت وقربت من قبورها
وأنا إللي باحفر قبورها
غصب عني مش بإرادتي
عمرها انتهى ولازم تدفن
بس من غير صلاة ولا كفن
الكفن ... !
لونه أبيض لون فستان الفرح
والطرحة تُل طويلة
عليها تاج لملكة عمرها ما كانت أنا
نسينا الفستان
ونسينا الزينة
ونسينا حاجات تانية كتيييييييير حلمنا بيها من صُغرنا
وياريتنا عجبنا !!!
مش فاضل غير حبة كرامة
وشوية أحلام بدأ يدب فيها الوهن والضعف
حلم واحد هافضل ماسكة فيه لآخر لحظة
وياريتها تكون قريبة
حلم واحد فاضل لإنه الحلم الوحيد إللي يقينا موجود
وبإذن الله هيكونله عندي وجود
الجنة
إيمان الحسيني
12/1/2007م

هناك 3 تعليقات:

Mohamed A. Ghaffar يقول...

حلم الجنه اعظم حلم ، بس لازم يكون فى احلام للدنيا عشان تعمر

رفقه عمر يقول...

كلامك جميل وحلم كلنا بنحلمه وربنا بس لازم نعمل لتحقيقه
ممكن اطلب منك طلب من فضلك ازاى اضع اغنيه على المدونه الخاصه بى لانى مش عارفه اعملها خالص

كلام لوجيك يقول...

حلم الجنة هو افضل واهم واعظم الاحلام
ربنا يكرمنا جميعا ويحسن خاتمتنا
اللهم اننا نعوذ بك من فتنة المحيا والممات وفتنة المسيخ الدجال
دمتم بخير