الجمعة، يناير 26، 2007

ياللي كنتي في يوم صديقتي ...


عندي صديقة
أو خلينا نلتزم الدقة أكتر في الكلام ...
كان عندي صديقة
وكنت باعتبرها أخت ليا
خاصة وإننا مرينا بظروف متشابهة بشكل غريب جدا
كانت بتتصل بيا وأتصل بيها
وتبعتلي رسايل وأبعتلها رسايل
وكل ما يسمح الوقت نتقابل (أصلها من محافظة تانية)
من حوالي سنة - أو أقل - كل ده توقف من ناحيتها هي بدون أي سبب !!!
فضلت أنا أتصل وابعت رسايل وأسأل عليها
وهي يا إما مش بترد عليا
يا إما كلمتين وخلاص
والغريب إني قابلت ناس - من القاهرة - قالولي إنهم شافوها من قريب وقابلوها
وأنا ولا أعرف !!!
والأغرب إنهم بيقولولي : دي بتحبك قوي يا إيمان !!!
للحظة حسيت بإني منبوذة
لكن رجعت وعدّلت إحساسي تجاه نفسي
من الواضح إنها استكفت مني وقررت تشوف صديقة تانية غيري
حقها طبعا
بس على الأقل يبقى فيه سبب أو مُقدمات !!!
ياللي كنتي في يوم صديقتي
أتمنالك التوفيق وراحة البال
وانسيني لإني هانساكي
وإذا حصل واتقابلنا قدرا في أي مكان ...
ماتتوقعيش إنك تشوفي مني نفس الوش إلي اتعودتي تشوفيه قبل كده
إيمان الحسيني

هناك 7 تعليقات:

الناي الحزين يقول...

السلام عليكم


لا يا ايمان هي اكييييييد ليها اسبابها وان كانت في نظرها هي فقط مهمه


المهم اني مش معاكي في اخر كلمه
طالما انك حبيتيها ومش هتنسيها ماعتقدش انك لكا تقابليها مش هتلاقي منك نفس الوش

العكس هو الصحيح

تمنياتي لكي بالا تفقدي ثقتك بنفسك بسبب شخص من وجهة نظرك انتي قد باعك

مدونه جميله ولمست قلبي

Mohamed A. Ghaffar يقول...

كمبدا عام أقول
أحبب عدوك هوناً ما فربما صار صديقاً يوماً ما ، وابغض صديقك هوناً ما فربما ينقلب عدواً يوماً ما

وكحالة خاصه اقول
ان كنت استنفذتى كل السبل والمحاولات المتاحه لمرعفه سبب انقطاعها فصبرى لعلها تعود واستقبليها بنفس وجهك الذى أعتادته منك وعاتبيها برفق فخير الناس أعذرهم للناس
وان كنت لم تستنفذى كل السبل بعد فستمرى حتى تستنفذيها

كلام لوجيك يقول...

انا لا هدافع ولا ههاجم عن حد
انا هتكلم من زاوية واحده بس

في بعض الأصدقاء اللى بنقابلهم في الحياة وبيكونوا كويسين جدا جدا والعلاقة معاهم بتكون بيرفكت وبيكونوا افضل من الاخوات
بس الكلام ده بيحصل طول ما في لينك بيربط بينهم
زي مثلا زمالة سكن مشترك او مشروع معين او مصلحة او ...او ...او
المهم ان العلاقه بتفتر وتنتهى فور اختفاء هذا الرابط الذي يربط بينهم

لكن طبعا مش كل الناس كده
واحنا طبعا مانقدرش نحلل درجة علاقتك بصاحبتك ونحكم عليها من خلال تلك السطور القصيرة
وغير كدا احنا مالناش اصلا ان نتدخل فيها
ولكن كل ما اتمناه هو الا يخسر اي انسان انسان اخر لإن العلاقات الانسانيه هي انبل ما يكون ونحن احوج من يحتاج اليها
فالانسان لا يستطيع العيش بمفرده

دمتم بخير

te3mah يقول...

جزاكم الله خير الجزاء يا جماعة الخير
بس فيه معلومة ماتعرفوهاش
إنها غيرت نمرة موبايلها
وأنا عرفت قدرا من أحد الأطراف إللي أنا وهي نعرفهم
ومع ذلك مازعلتش إنها مابلغتنيش بالنمرة الجديدة
وأخدت من الشخص ده النمرة الجديدة واتصلت بيها
وكان ردها كلمتين وبس
وبعتلها رسائل في العيد الصغير والعيد الكبير
وبرضه لا حياة لمن تنادي

بمعنى أصح
هي قافلة في وشي أي باب للكلام أو حتى للعتاب علشان أعرف إيه سبب تغيرها ده

أما بخصوص المصالح المشتركة
فالكلمة دي اتقاليتلي برضه من شخص يعرفها ويعرفني :
طالما مش عاوزة منك حاجة يبقى مش هتتصل بيكي !!!!

الله المستعان

Mohamed A. Ghaffar يقول...

لو كده يبقى كبرى

رفقه عمر يقول...

شوفى مش انت لوحدك اللى مريتى بنفس الموقف انا كمان مريت به كتير قوى ومن غيرسبب بس تعرفى ربنا بعد كدة بيعوض بجد باصدقاء يحبوكى فعلا من غير مصلحه ولكن لله فقط انا عارفه بيكون الامر شديد فى لاول بس انشاء الله هاتنسى وكله بيعدى

arabprof يقول...

طالما انتي على حق ولم تخطئي بحقها لا تحزني
ان شاء الله يكون سبب ابتعادها هو خير وان شاء الله يبدلك خير منها