الجمعة، أبريل 13، 2007

أوراقي القديمة

وسط أوراقي القديمة
التقيت وردة حمرا
السنين عديت عليها
بس ليها في قلبي ذكرى
دمعة نزلت من عنيا
قولت لو تملك إيديا
كنت أرجع بالسنين
نبقى تاني صغيرين

أغنية قديمة لليلى غفران افتكرتها من حوالي أسبوع
السبب ؟!!!

كنا في الكويت زمان
وكنا عايشين في جزيرة تابعة للكويت اسمها جزيرة فيلكا
كانت عبارة عن مدينة صغيرة فيها كل إمكانيات الحياة الحديثة
بعد الغزو العراقي للكويت وحرب التحرير تحولت الجزيرة لخرابة وادمرت تماما
وأصبحت غير مأهولة بالسكان زي الأول

أخويا (أحمد الحسيني) حاليا بيعمل في الكويت
وطلع رحلة للجزيرة هو وزوجته
وصورلنا كل الأماكن إللي شهدت طفولتنا الجميلة أنا وهو وأختي



الفيلا دي كانت أول سكن نتواجد فيه لما شغل بابا اتنقل للجزيرة
كان عندي تقريبا سنتين
وقعدنا فيها تقريبا 4 سنين
صدقوني لسه فاكراهم بالتفاصيل كمان
سواقة العجل
والجيران من مختلف الجنسيات
والسهر بالليل قدام بيت واحد منهم




الجمعية التعاونية

كانت موول تجاري صغير فيه كل حاجة بمعنى الكلمة بس على قد تعداد الجزيرة



ثانوية فيلكا المشتركة بنات


كلمة (مشتركة) في دول الخليج بتعني إن المدرسة إعدادي (متوسط) وثانوي مع بعض

مش مختلطة زي هنا في مصر

وكان جنبها مدرسة البنات الابتدائية والروضة

المدارس كانت قدام شاطيء الخليج العربي مباشرة




انتقلنا بعد كده من الفيلا لمنطقة الشاليهات جنب شغل بابا

الشاليه ده شهد أحلى أيام عمري بمعنى الكلمة

أشهد بإني فعلا عيشت طفولة سعيدة جدا

شاطيء البحر هناك ليه معانا ذكريات جميلة جدا

كان رمضان بيجي لسه في الصيف

وفي السنة إللي ما ننزلش فيها أجازة لمصر

كنا بنقضي رمضان على شاطيء البحر

ونفضل سهرانين هناك لحد الفجر

كان صعب علينا هنا نشوف صور لأحلى أيام عمرنا وهي بالمنظر ده

بعد ما عيشنا فيها وهي جنة بالفعل

وأكيد كان الأمر أصعب على أخويا

إللي صور مدرسته وفصله وهو في الثانوية العامة

وكفاية إنه تواجد في نفس الأماكن

بس مع الفارق

الحمد لله على كل حال


" كُلُّ مَنْ عَلَيْهَا فَانٍ ، وَيَبْقَى وَجْهُ رَبِّكَ ذُو الْجَلالِ وَالإِكْرَامِ "

الرحمن (27:26)

هناك 17 تعليقًا:

Ahmed يقول...

كل من عليها فان
صدقتي والله ، كان صعب جدا على الواحد انه ياخد الصور دي بالشكل اللس شوفتيه ، وصدقيني لما اقولك اني قعدت فترة بعد كده مش عارف انام لاني مش مستوعب اللي حصل
ولله الامر في الأولى والآخرة

محمد عبد الغفار يقول...

انا لو شفت بيتى القديم ومدرستى وغيرها بالشكل ده يجرالى حاجه

إيمان الحسيني يقول...

والله يا أحمد أنا عمالة أتفرج على الصور واقول بصوت عالي :
جالك قلب يا أحمد تروح وتشوف الدمار ده كله ؟!!!!



محمد عبد الغفار
جزاك الله كل خير
وربنا يسترها مع الجميع
اللهم آمين

حائر في دنيا الله يقول...

جميلة هي الذكريات عندما تكون جميلة وتستعاد
ولكن عندما تكون جميلة وتعود علينا بهذه الطريقة فإنها صعبة جدا على النفس والروح ان تقبلها
فهي جزء منا والصور هذه اعتقدت انها خدشت شيئا فيه

Dr.khaled يقول...

لا حول ولا قوة الا بالله

نسأل الله ان يغفر لنا ذنوبنا
بارك الله في صاحبة المدونة
باارك الله فيكي
وتقبلي تحياتي

أخوكم في الله/خالد

مشروع انسان يقول...

لا حول ولا قوة الا بالله
صعب الواحد يشوف الذكريات المؤلمة
بس برضه عشان يفتكر نعمة ربنا عليه
ويشوف هو بقى فين دلوقتى ويشوف الفرق

mohamed يقول...

الناس بتبنى وتعمر واحنا ياعرببيوقعونا فى بعض عشان ندمرفى بعضينا...................حسبنا الله ونعم الوكيل

أُكتب بالرصاص يقول...

مافيش شيء هايبقا
لكن الالم فعلا شديد لما الواحد يخسر ذكرياته بالشكل دا


ليا ملحوظة
لو تقدري كبري الصور هايكون افضل كتير

ibn_abdel_aziz يقول...

مكنتش اعرف انك كنتي عايشة في الكويت

وفيلكا كمان
؟
انا كنت عايش في النقرة ومشفتش الكويت من ساعة الحرب

نفسي ارجع اشوف بيتنا والجامع اللي كنت بصلي فيه ومدرستي والشوارع

إيمان الحسيني يقول...

حائر ...
تصدق دلوقتي كل ما أحاول أتذكر شيء هناك أتذكره بشكل الصور الحالي ؟
مش قادرة أرجع للشكل الحقيقي !!!

إيمان الحسيني يقول...

جزاك الله خير الجزاء أخي خالد
ونسأل الله العفو والعافية
اللهم آمين

إيمان الحسيني يقول...

إمام الجيل
فعلا نعم ربنا علينا كتيرة
بس الذكريات الجميلة في أحيان كتيرة بتبقى دافع قوي للاستمرار

إيمان الحسيني يقول...

أخي محمد
اتفق العرب على ألا يتفقوا

إيمان الحسيني يقول...

جزاك الله كل خير يا أكتب بالرصاص
معلش مش هاقدر أكبر الصور عن كده لأنها هتضرب حجم المدونة

إيمان الحسيني يقول...

منور المدونة يا ابن عبد العزيز
أنا واخواتي من مواليد الكويت أصلا
بس ماحضرناش الغزو
كنا في مصر وقتها
والدي إللي حضره
والحمد لله رجع بالسلامة

كراكيب عادل يقول...

انا في الكويت من 9 سنين ومرحتش فيلكا

شفتها بس من علي الابراج

:)

رحت جزيرة كبر

علي حد علمي فيلكا حاليا ممنوع حد يزورها

إيمان الحسيني يقول...

جزاك الله خير الجزاء يا عادل
وجزيرة فيلكا دلوقتي غير صالحة طبعا للسكن والحياة
لكن تقدر تقول إنها بقيت مزار سياحي


آخر مرة طلعت فيها الأبراج كان عندي سنتين :(