أوراقي القديمة

وسط أوراقي القديمة

التقيت وردة حمرا

السنين عديت عليها

بس ليها في قلبي ذكرى

دمعة نزلت من عنيا

قولت لو تملك إيديا

كنت أرجع بالسنين

نبقى تاني صغيرين

أغنية قديمة لليلى غفران افتكرتها من حوالي أسبوع

السبب ؟!!!

كنا في الكويت زمان

وكنا عايشين في جزيرة تابعة للكويت اسمها جزيرة فيلكا

كانت عبارة عن مدينة صغيرة فيها كل إمكانيات الحياة الحديثة

بعد الغزو العراقي للكويت وحرب التحرير تحولت الجزيرة لخرابة وادمرت تماما

وأصبحت غير مأهولة بالسكان زي الأول

أخويا (أحمد الحسيني) حاليا بيعمل في الكويت

وطلع رحلة للجزيرة هو وزوجته

وصورلنا كل الأماكن إللي شهدت طفولتنا الجميلة أنا وهو وأختي

الفيلا دي كانت أول سكن نتواجد فيه لما شغل بابا اتنقل للجزيرة

كان عندي تقريبا سنتين

وقعدنا فيها تقريبا 4 سنين

صدقوني لسه فاكراهم بالتفاصيل كمان

سواقة العجل

والجيران من مختلف الجنسيات

والسهر بالليل قدام بيت واحد منهم

الجمعية التعاونية

كانت موول تجاري صغير فيه كل حاجة بمعنى الكلمة بس على قد تعداد الجزيرة

ثانوية فيلكا المشتركة بنات

كلمة (مشتركة) في دول الخليج بتعني إن المدرسة إعدادي (متوسط) وثانوي مع بعض

مش مختلطة زي هنا في مصر

وكان جنبها مدرسة البنات الابتدائية والروضة

المدارس كانت قدام شاطيء الخليج العربي مباشرة

انتقلنا بعد كده من الفيلا لمنطقة الشاليهات جنب شغل بابا

الشاليه ده شهد أحلى أيام عمري بمعنى الكلمة

أشهد بإني فعلا عيشت طفولة سعيدة جدا

شاطيء البحر هناك ليه معانا ذكريات جميلة جدا

كان رمضان بيجي لسه في الصيف

وفي السنة إللي ما ننزلش فيها أجازة لمصر

كنا بنقضي رمضان على شاطيء البحر

ونفضل سهرانين هناك لحد الفجر

كان صعب علينا هنا نشوف صور لأحلى أيام عمرنا وهي بالمنظر ده

بعد ما عيشنا فيها وهي جنة بالفعل

وأكيد كان الأمر أصعب على أخويا

إللي صور مدرسته وفصله وهو في الثانوية العامة

وكفاية إنه تواجد في نفس الأماكن

بس مع الفارق

الحمد لله على كل حال

" كُلُّ مَنْ عَلَيْهَا فَانٍ ، وَيَبْقَى وَجْهُ رَبِّكَ ذُو الْجَلالِ وَالإِكْرَامِ "

الرحمن (27:26)