* ألف مبروك لكل الناجحين والناجحات في الثانوية العامة بعد شهر إمتحانات مرير مرينا بيه كلنا وحسينا بالظلم إللي كان فيه ، وبإذن الله نطمن على كل إللي مش مقدرلهم النجاح السنة دي بإنهم ينجحوا السنة الجاية .
* في يوم نتيجة الثانوية العامة بتاعتي (1993/1994) كنت عاملة زي الفرقع لوز في البيت لحد ما نمت بما يُشبه الإغماء بسبب السهر لمدة 3 أيام من القلق .
* في نفس اليوم لقينا راجل كبير في الحي عندنا ماسك جمل وداير يلف بيه المنطقة كلها وهو بيغني : مبروك مبروك يا محمد ... تقريبا الراجل كان نادر إنه يدبح جمل لو ابنه نجح في الثانوية العامة .
* وفي نفس اليوم برضه فضلت أسمع النتايج في الراديو وكنت باستغرب جدا لما أسمع المذيع بيقول اسم المدرسة وبعدها تعليق : لم ينجح أحد !!!
* أغنية (الناجح يرفع إيده) لعبد الحليم مازال لها نفس الرونق ومازالت ترسم ابتسامة التفاؤل على الوجوه (مع ملاحظة إن أول كلماتها غير جائز شرعا لإنه حلف بغير الله) .
* النهاردة الصبح الساعة ستة ونص قاعدة في أمان الله في الصالة عندنا لقيت الكرسي بيروح ويجي بيا ، بصيت للنجفة لقيتها رايحة وجايه مع نفسها ... عرفت إنه زلزال ، الواحد بقاله كتير ما شافش زلازل !!! تقريبا كان من توابع الثانوية العامة.... الزلزال كان مركزه في البحر المتوسط بقوة 6.3 على مقياس ريختر علشان كده ولله الحمد كان إحساسنا بيه خفيف .
هناك 15 تعليقًا:
كنت صاحى فى الوقت ده كالعاده يعنى ولم ألاحظ اى شئ
بكره اغنيه الناجح يرفع ايده وبكره اللى الناس عملته فى الثانويه العامه قسماً بالله العظيم ما بتفرق
يمكن عشان سقطت اول مره فى الثانويه العامه؟ يمكن
اللهم لا تعذبنا بما كسبت أيدينا
ازاى تبصى للنجفة والكرسى وهو اللى بيتهز انت السبب فى الزلزال
اللهم ارحمنا
معلش يا محمد
قلبت عليك المواجع
بس أكيد سنة النجاح كان ليها طعم تاني
أخي الكريم عصفور المدينة
أأمن على دعاءك : اللهم آمين
اللهم حوالينا لا علينا
طعمه..عندى فوبيا من الزلازل تلزمنى منذ زلزال 92
اما الثانويه العامه
ربنا معاهم يارب...ويصبر اهلم على المصريف اللى راحت هباء
أخي الكريم الطائر الحزين
احتمال برضه أكون أنا السبب خاصة وإني لحظتها كنت باقرر ماروحش الشغل النهاردة
:)
ربنا يسترها معانا جميعا يا أم البنات
اللهم آمين
السلام عليكم
الحمد لله علي كل شئ
وعليكم السلام ورحمة الله الله وبركاته
فعلا ... الحمد لله على كل حال
ياه فكرتينى بالذى مضى
انا ايام الثانويه بعد الامتحان بفتره نسيت انا حليت ولا لاء
وجالى هاجس انى محلتش كويس وانتى بوظت الدنيا
وتوقعت رسوبى فى جميع المواد لانى نسيت انا حليت ازاى
ولما اخدوا رقمى علشان يجيبوا نتيجتى من الكنترول وقتها كنت عاوز اديهم رقم الجلوس غلط من شده رعبى
ولما عرفت انى الحمد لله من المتفوقين مصدقتش
الا لما اسمعها من مكرفون المدرسه
بس كنت رايح المدرسه اكنى رايح غرفه نتفيذ حكم الاعدام
تحياتى
أنا بقى ساعة ما عرفت نتيجتي قعدت أعيط وأضحك مع بعض
إزاي مش عارفة !!!
منور يا ممكن :)
طعمه
طعمه
طععععععععععععععمه
بطلى تغيري فى المدونه
هحقد عليكى وربنا
.......
ماحستش بالزلزال
ولا بأى حاجه
كنت مقتوله :D
صحيح
يوم النتيجه بتاعتى كنت بااااااااااااااارده
يمكن كنت قلقانه شويه
بس عادي يعنى
ماكانتش فارقه معايا اوى
D:
يا ستار يا رب
ربنا ما يجعلنا جار وله عنين
:P
ماعتقدش إن فيه حاجة بتبقى فارقة معاكي يا رضوى
بصراحة باحسدك على الموضوع ده
مش حسد طبعا هو غبطة
:)
إرسال تعليق